Səhiyyə Nazirliyinin İctimai Səhiyyə və İslahatlar Mərkəzində (İSİM) Ümumdünya Səhiyyə Təşkilatının (ÜST) Avropa üzrə Regional Ofisinin Uşaqlarda Piylənməyə Nəzarət Təşəbbüsü (COSI) tədqiqatı ilə bağlı illik hesabata dair "dəyirmi masa" keçirilib.

 

İSİM-dən Aztibb.az-a bildirilib ki, tədbirdə mərkəzin direktoru Qəhrəman Haqverdiyev uşaqlar arasında artıq çəki və piylənmənin risk amillərinin öyrənilməsinə dair aparılan, Elm və Təhsil Nazirliyi ilə birgə əməkdaşlıq çərçivəsində həyata keçirilən tədqiqatla bağlı ətraflı məlumat verib. Bildirib ki, ölkəmizdə belə bir tədqiqatın aparılması məktəbyaşlı uşaqlar arasında artıq çəki və az çəki ilə bağlı tendensiyaların araşdırılması, prioritet istiqamətlərin müəyyən edilməsi, mövcud durumun mütəmadi qiymətləndirilməsi istiqamətində mühüm addımdır.

 

Sonra İlkin səhiyyə və ailə təbabəti şöbəsinin müdiri Lütfi Qafarov təqdimatla çıxış edərək nəzərə çatdırıb ki, 2022-ci ildə keçirilən sorğu Bakı şəhəri və regionlardan olan 128 məktəbdən 4820 nəfər arasında aparılıb. Tədqiqatda iştirak təklifi almış uşaqların 99,2%-i iştirak edib ki, onlardan 2827 nəfəri 8 yaş təşkil edib.

 

Tədbirdə tədqiqatın gedişatı ilə bağlı ilkin (texniki) hesabat dinlənilib və müzakirə edilib. Bildirilib ki, əsas geniş analitik hesabat gələn ilin əvvəlində təqdim olunacaq.

 

Qeyd edək ki, məktəbyaşlı uşaqlar arasında artıq çəki və piylənmənin artması dünyanın bir çox ölkələrində qlobal ictimai səhiyyə problemi kimi təsnif edilir və hazırda ölkəmizdə aparılan bu tədqiqat ÜST-nin metodologiyaları, beynəlxalq koordinasiyası və dəstəyi ilə həyata keçirilir.