Ürək orqanizmimizdə ən vacib əzələli orqandır. Ürək bədənimizdə olan qanı “sirkulyator sistem” adlanan qan-damar sistemi vasitəsilə bütün orqanizmə vurur. 

 

Aztibb.az xəbər verir ki, Liv Bona Dea Hospitalının həkimi, tanınmış ürək-damar cərrahiyyə uzmanı Cabir Gülmalıyev ürək sağlamlığı ilə bağlı yanlış fikirləri diqqətə çatdırıb:

 

"Ürək xəstəliyi olanlar idman edə bilməz". Ürək xəstəliyi olanlar təhlükəsiz məşq etmək və idmandan faydalanmaq üçün məşq proqramına həkimləri ilə məsləhətləşərək başlamalıdırlar.

 

"Ürək əməliyyatı keçirən insanlar üçün hərəkət etmək çətindir". Sağalma dövrü 2 ayı tamamlayan insanlar hərəkət etməkdə çətinlik çəkmədən tam şəkildə gündəlik həyatlarına qayıda bilirlər.

 

"Davamlı idman edən və ideal çəkidə olan insanlar infarkt keçirmir". Aktiv həyat tərzinə və normal çəkiyə baxmayaraq, infarkt baş verə bilər. Yanlış həyat tərzi, qeyri sağlam qidalanma və genetika infarkt səbəblərindəndir.

 

"Gənclər infarkt keçirmir". Son illərdə artan siqaret çəkmə, oturaq həyat tərzi, piylənmə, qeyri-sağlam qidalanma kimi risk faktorları gənclərdə infarkt hallarının artmasına səbəb olur.

 

"Ailənizdə infarkt yoxdursa, sizdə də olmayacaq". Ailədə ürək-damar xəstəliklərinin olması ürək xəstəliyi riskini iki dəfə artırır. Ancaq ailədə ürək xəstəliyi olmamasına baxmayaraq, koronar arteriya xəstəliyi üçün başqa risk faktorları varsa, infarkt riski artır.

 

 "Qadınlar kişilərə nisbətən daha az infarkt keçirir". Premenopauzal dövrdə qadınlarda infarkt riski kişilərlə müqayisədə yarı olur, lakin postmenopozal dövrdə risk sürətlə artır və kişilərlə bərabər olur.

 

"Uzun illərdən sonra siqareti buraxmağın heç bir faydası yoxdur". İnfarkt keçirmə riski siqareti buraxdıqdan sonra üç il ərzində yarıya enir, 6 ilin sonunda isə risk siqaret çəkməyənlər səviyyəsinə çatır.

 

"Ürək xəstəliyi olanlar yağdan heç istifadə etməməlidir". Gündəlik alınacaq enerjinin 30 faizi yağdan gəlməlidir. Heyvan mənşəli yağlar yerinə bitki yağlarına üstünlük verilməlidir (zeytun, günəbaxan və qarğıdalı yağı).