Anestezioloq-reanimatoloq Mehdi Əliyev - Həkimlərimizi tanıyaq! - aztibb.az AZƏRBAYCANIN SƏHİYYƏ XƏBƏR PORTALI

Anestezioloq-reanimatoloq Mehdi Əliyev - Həkimlərimizi tanıyaq!

06.12.2022 13:31

Aztibb.az-ın “Həkimlərimizi tanıyaq!” rubrikasında Mərkəzi Gömrük Hospitalının Anesteziologiya və reanimasiya şöbəsinin həkim anestezioloq-reanimatoloqu Mehdi Əliyevi sizə təqdim edirik.

Mehdi Əliyev 1994-2000-ci illərdə Azərbaycan Tibb Universitetində Müalicə işi fakültəsində təhsil alıb, 2000-2001-ci illərdə 1nömrəli Şəhər Kliniki xəstəxanasının Anesteziologiya və reanimasiya kafedrasında internatura keçib. 2007-2011-ci illərdə İtaliyanın Milan şəhərində “Ospedale Maggiore of Milan” xəstəxanasının Anesteziologiya və İntensiv terapiya kafedrasında beynəlxalq təqaüd proqramı üzrə, 2012-2013-cü illərdə Türkiyənin İzmir şəhərində Ege Universitetində ürək-damar cərrahiyyəsi üzrə təhsil alıb.

O, 2003-2006-ci illərdə Azərbaycanın özəl tibb müəssisəsində təcili tibbi yardım həkimi kimi çalışıb, 2012-ci ildən isə Mərkəzi Gömrük Hospitalının Anesteziologiya və reanimasiya şöbəsində anestezioloq-reanimatoloq kimi fəaliyyət göstərir.

Həkim Mərkəzi Gömrük Hospitalında müasir tibbi innovasiyalara əsasən ümumi anesteziya, regional anesteziya, Traxeyanın intubasiyası və ekstubasiyası, mərkəzi damarlara kateterin qoyulması, invaziv və non-invaziv monitorinq, ağciyərlərin invaziv və non-invaziv ventilyasiyası, traxeostomanın açılması, ağrı terapiya pompasının tətbiqi, onurğa beyin mayesinin alınması, bronxoskopiya, bronxların lavajı, ağır tənəffüs və ürək çatışmazlıöı xəstələrində ECMO tətbiqinin istifadəsi, defibrilasiya və kardioversiya kimi sahələrdə müayinə və müalicələr aparır.

Mehdi Əliyev 2005-ci ildə Şotlandiyanın Aberdin Universitetində “Qabaqcıl Kardiyak və Travma Həyat Dəstəyi Bacarıqları” kursunda, 2010-cu ildə RumıniyaTəcili və Fövqaladə hallar üzrə Tibbi Cəmiyyətin təşkilatçılığı ilə Təcili və Təxirəsalınmaz Kliniki Hospitalında keçirilən "Təxirəsalınmaz tibbi yardım beynəlxalq" təlimdə iştirak edib və sertifikat alıb.

2021-ci ildə o, Azərbaycan Respublikası Səhiyyə Nazirliyi tərəfindən Fəxri fərman ilə təltif olunub. Mehdi Əliyev Azərbaycan Reanimatoloqlar və Anestezioloqlar Cəmiyyətinin, Avropa Anestezioloqlar Cəmiyyətinin, Türkiyə Anesteziologiya və Reanimasiya Cəmiyyətinin və Avropa İntensiv Terapiya Təbabəti Cəmiyyətinin üzvüdir. Həmçinin 2022-ci ildən Akad. M.A.Topçubaşov adına Elmi Cərrahiyyə Mərkəzi PHŞ-nin "Anesteziologiya və reanimatologiya" ixtisası üzrə qiyabi doktorantıdır.