Bu gün Azərbaycan Respublikası Dövlət Gömrük Komitəsinin Tibbi Xidmət İdarəsi Mərkəzi Hospitalının rəisi - baş həkim Elman Məmmədovun 50 yaşı tamam olur.
Elman Məmmədov 6 dekabr 1972-ci ildə anadan olub. 1996-cı ildə Azərbaycan Tibb Universitetinin Pediatriya fakültəsini bitirib. 1997-ci ildə 7 saylı Uşaq Yoluxucu Xəstəliklər Xəstəxanasında internatura keçib.
O, əmək fəaliyyətinə 1998-ci ildə Bakı şəhər Təcili Yardım stansiyasında həkim kimi başlayıb. 2009-2011-ci illərdə Azərbaycan Respublikası Dövlət Gömrük Komitəsinin Tibbi Xidmət İdarəsi Mərkəzi Hospitalında Xəstə xidmətləri şöbəsinin rəisi işləyib, 2011-ci ildən DGK TXİ MH rəisi-baş həkimi vəzifəsində çalışır.
Elman Məmmədov 2017-ci ildən etibarən tibb xidməti polkovnikidir. 2017-ci ildə Azərbaycan Respublikası Dövlət Gömrük Komitəsinin 25 illiyi yubiley medalı ilə təltif olunub. O, 2019-cu ildə Dövlət Gömrük Komitəsi, 2020-ci ildə isə Səhiyyə Nazirliyi tərəfindən Fəxri fərmanlarla təltif olunub. Həmçinin 2022-ci ildə “Azərbaycan Respublikası Dövlət Gömrük Komitəsinin 30 illiyi” Azərbaycan Respublikasının yubiley medalına layiq görülüb.
Xalqına bağlı ziyalı, xeyirxah insan, bacarıqlı təşkilatçı və sözün həqiqi mənasında əsl vətəndaş olan Elman Məmmədov şəxsi keyfiyyətləri, universallığı və ensiklopedikliyi ilə daim seçilib, kollektivin böyük rəğbətini qazanıb.
Aztibb.az portalı adından Elman Məmmədovu 50 illik yubileyi münasibətilə təbrik edir, ona möhkəm cansağlığı və fəaliyyətində uğurlar arzulayırıq.