Bu gün Elmi-Tədqiqat Tibbi Bərpa İnstitutunun sabiq direktoru, ATU-nun Fizioterapiya və Tibbi Reabilitasiya kafedrasının müdiri, Rusiya Tibb Elmləri Akademiyasının fəxri doktoru, AMEA-nın müxbir üzvü, professor Əlişir Musayevin anım günüdür.

Aztibb.az xəbər verir ki, elmdə atdığı ilk addımlarından başlayaraq Əlişir müəllimin elmə böyük həvəsi, istedadı, analitik təfəkkürü, məqsədyönlü inadkarlığı ilə səciyyələnib və onun gələcəkdə böyük alim kimi inkişaf etməsinə zəmin yaratmışdır.

Professorun məqsədyönlü əməyi nəticəsində institutda yeni nəsil alim, kadr hazırlanmasına müvəffəq olunmuşdur. Onun rəhbərliyi altında 2 doktorluq, 19 namizədlik dissertasiyası müdafiə olundu, bir çox maraqlı elmi mövzuların tədqiqatları aparılmışdır. Məhsuldar, məqsədyönlü fəaliyyətinin nəticəsi olaraq prof. Ə.Musayevin elmi məktəbi formalaşmışdır.

Professor Ə.Musayev Səhiyyə Nazirliyinin, Azərbaycan Milli Elmlər Akademiyasının fəxri fərmanı ilə təltif olunmuş, Azərbaycan Respublikası Prezidentinin fərmanı ilə “Əməkdar elm xadimi” fəxri adına layiq görülmüş, Beynəlxalq miqyasda əldə etdiyi elmi nailiyyətlərinə görə Amerika Bioqrafiya tədqiqatlar Mərkəzi tərəfindən “Qold Rekord” medalı ilə təltif olunmuşdur.

Tibbi və bioloji elmlərin inkişafındakı əhəmiyyətli xidmətinə görə o, Gürcüstan Respublikasının Profilaktik Təbabət və Ekologiya Akademiyasının həqiqi üzvü və “Rusiya Tibb Elmləri Akademiyasının fəxri doktoru” seçilmişdir.  Alim, həmçinin Türk Dünyası Elmləri Akademiyasının həqiqi üzvü seçilmiş və bu Akademiyanın Qızıl medalına layiq görülmüşdür. Avropa Təbiət Elməlri Akademiyasının akademiki və Beynəlxalq Mühəndislik Akademiyasının müxbir üzvü seçilmişdir. BMT-nin İctimai Təltiflər Şurasının I-ci dərəcəli Hippokrat Ordeni ilə təltif edilmişdir.

Əlişir Musayev 2020-ci il aprelin 27-də 70 yaşında dünyasını dəyişmişdir.