Avropa İttifaqının maliyyə dəstəyilə həyata keçirilən COVID-19 əleyhinə Vaksinasiyaya Dəstək layihəsi və Ümumdünya Səhiyyə Təşkilatının Səhiyyədə Fövqəladə Hallar Proqramı çərçivəsində “Azərbaycanda səhiyyədə fövqəladə hallarda icmalarla iş: öyrənilmiş dərslər və gələcəyə baxış” mövzusunda təlim keçirilib.

 

Aztibb.az TƏBİB-ə istinadla xəbər verir ki, təlimdə TƏBİB-in İctimaiyyətlə əlaqələr və tədbirlərin təşkili şöbəsinin müdiri Zamirə Ədilova, Ana və uşaq sağlamlığının təşkili şöbəsinin məsləhətçisi Günel Məmmədova, İxtisaslı tibbi yardım xidmətinin təşkili şöbəsinin mütəxəssisi Şəfiqə İsmizadə iştirak edib.

 

Təlim çərçivəsində Günel Məmmədova “TƏBİB-in Azərbaycanda icmaların iştirakı ilə həyata keçirilən tədbirlər və öyrənilmiş dərslər haqqında” mövzusunda təqdimatla çıxış edib.

 

Təqdimatda ÜST-nin maliyyə dəstəyilə Avropa İmmunlaşdırma həftəsi çərçivəsində Şamaxı rayonunun 6 kəndində keçirilən immunizasiya kampaniyası zamanı keyfiyyətli xidmətin təşkili (immunlaşdırma əhatəliliyin və göstəricilərin artırılması) məqsədilə icmaların cəlb edilməsi, əldə edilmiş müsbət nəticələr, icmaların bu prosesin həyata keçirilməsində rolu barədə məlumatlar verilib.

 

Qeyd edək ki, təlim pandemiyadan öyrənilmiş dərsləri müəyyən etmək və onlardan risk kommunikasiyası və icmalarla işlə bağlı gələcək fəaliyyətlərdə istifadə üçün bilikləri və bacarıqları artırmaq məqsədi daşıyıb.

 

2 gün davam edən təlimdə yerli səhiyyə qurumları, qeyri-hökumət təşkilatları və BMT agentlikləri daxil olmaqla 20-dən çox qurum təmsil olunub. Təlimin sonunda iştirakçılar sertifikatla təltif edilib.