Həkimlik şəfalı, şəfqətli, xeyirxah və humanist bir peşədir. Bütün zamanlarda, xalqlar arasında həkim cəmiyyətin ən çox sevilən və hörmət edilən təbəqəsi sayılıb, onların haqqında hikmətli sözlər yazılıb. 

Aztibb.az-ın "Həkimlərimizi tanıyaq!" rubrikasında söz açacağımız Fatma Abdullayeva da sevilən, seçilən həkimlərimizdəndir. O, mənalı həyatını bütünlüklə şərəfli işinə, müqəddəs peşəsinə, insanların problemlərinə və sağlamlığına həsr edib.

Fatma Məmmədrəsul qızı Abdullayeva 3 aprel 1956-cı ildə Zaqatala şəhərində anadan olub. 1973-cü ildə Zaqatala şəhər 1 saylı tam orta məktəbi bitirib, 1973-1980-cı illərdə N.Nərimanov adına Azərbaycan Dövlət Tibb İnstitutunda Müalicə işi ixtisası üzrə təhsil alıb və həmin institutda internatura keçib.

O, 1980-1982-ci illərdə Muxax kəndində həkim-terapevt, 1982-1983-cü illərdə Zaqatala Rayon Mərkəzi Xəstəxanasının Təcili Tibbi Yardım şöbəsində həkim-terapevt, 1983-1994-cü illərdə Car kənd həkim ambulatoriyasında baş həkim vəzifələrində çalışıb.

1994-cü ildə Zaqatala Rayon Mərkəzi Xəstəxanasının Terapiya şöbəsində həkim-terapevt kimi fəaliyyətə başlayan Fatma Abdullayeva ixtisas dəyişim kursu keçdikdən sonra 1995-ci ildən bugünədək Terapiya şöbəsində həkim-kardioloq vəzifəsini icra edir.

Fatma Abdullayeva uzun illərdir Azərbaycan Kardiologiya Cəmiyyətinin üzvüdür. O, cəmiyyətin kardioloji konfranslarında, seminarlarında fəal iştirak edir.