Azərbaycan dövləti şəhid ailələrinə, müharibə veteranlarına və qazilərə yüksək diqqət və qayğı göstərir. Bu siyasəti rəhbər tutaraq Elmi-Tədqiqat Kardiologiya İnstitutunun əməkdaşları şəhid ailələri və qazilər üçün tibbi aksiyalar aparılmasını davam edir.

İnstitutdan Aztibb.az-a verilən məlumata görə, Elmi-Tədqiqat Kardiologiya İnstitutunun təşkilatçılığı və təşəbbüsü ilə Şəki Rayon Mərkəzi Xəstəxanasında növbəti tibbi aksiya təşkil edilib.

Aksiya Səhiyyə Nazirliyi, İcbari Tibbi Sığorta üzrə Dövlət Agentliyi, TƏBİB, Şəki İcra Hakimiyyəti, Şəki Rayon Mərkəzi Xəstəxanasının dəstəyi ilə keçirilib.

Tədbir zamanı Şəki rayonundan 100-dən artıq şəhid ailəsi, qazi və Vətən müharibəsi iştirakçısı tibbi müayinələrdən keçib.

ETKİ-nin direktoru, prof. Gülnaz Dadaşova bildirib ki, Prezident İlham Əliyev bütün dövlət qurumları qarşısında bu həssas təbəqəyə aid olan insanların problemlərinin həllini bir nömrəli vəzifə kimi müəyyən edib və institut əməkdaşları bu aksiyaları davam etdirəcək.

Eyni zamanda, xəstəxananın akt zalında həkimlər üçün elmi-praktik seminar təşkil edilib.

Aksiya “World Medicine” dərman şirkətinin dəstəyi ilə keçirilib.