Azərbaycan Tibb Universitetinin (ATU) Uşaq stomatologiyası kafedrasının assistenti Sevinc Nağıyeva İzmir Diş Həkimləri Birliyinin Elmi Konqresində iştirak edib. 

Aztibb.az ATU-ya istinadla bildirir ki, əvvəlki illərdə konqresin Elmi Komitəsinin üzvü olan S.Nağıyeva bu il məruzəçi kimi dəvət alıb. O, tədbirdə “Tip 1 diabetli uşaqlarda diş əti xəstəliklərinin diaqnozu və müalicəsi” mövzusunda məruzə ilə çıxış edib. 

Məruzəçi yaşadığımız dövrün ən qlobal xəstəliklərindən biri olan diabetə uşaqlarda da çox rast gəlindiyini və bu xəstəliyin həzm sisteminin bir hissəsi olan ağız boşluğunda da fəsadlar törədərək dişlərin vaxtsiz itirilməsinə səbəb olduğunu diqqətə çatdırıb. S.Nağıyeva türkiyəli mütəxəssislərlə fikir mübadiləsi aparıb, ATU-dakı tədris prosesi haqda məlumat verib.

Qeyd edək ki, 29-cu Beynəlxalq Diş Həkimləri Konqresində 1100 həkim və 250 tələbə bir araya gəlib. Tədbir çərçivəsində praktik həkimlər üçün önəm daşıyan tibbi və stomatoloji materialların ənənəvi satış sərgisi də təşkil olunub.

Müəllif: Səadət Məmmədova