14-18 noyabr 2022-ci il tarixlərində Dövlət Gömrük Komitəsinin Tibbi Xidmət İdarəsinin Elmi-Təcrübi Tədris Mərkəzinin mütəxəssisi Şəhla Mirzəzadə Azərbaycanda ictimai səhiyyə mütəxəssislərinin təkmilləşdirilməsinə dəstək məqsədilə həyata keçirilmiş "İcma yönümlü sağlamlıq xidməti (İYSX)" təlim kursunda iştirak edib.

Gömrük Hospitalından Aztibb.az-a bildirilib ki, təlim USAID tərəfindən maliyyələşdirilən, Ümumdünya Səhiyyə Təşkilatının (ÜST) Azərbaycandakı Nümayəndəliyi, Azərbaycan Respublikası Səhiyyə Nazirliyi, İcbari Tibbi Sığorta üzrə Dövlət Agentliyi və TƏBİB tərəfindən birgə həyata keçirilən "Azərbaycanda pandemiyaya cavab tədbirləri" layihəsi çərçivəsində baş tutub.

Qeyd edək ki, İYSX icmanın xüsusiyyətlərini nəzərə almaqla və icma üzvlərinin fəal iştirakı ilə xəstəliklərin qarşısının alınması və sağlam həyat tərzinin təbliği ilə bağlı müxtəlif qurumların əməkdaşlığını nəzərdə tutur.

Təlim kursunda "Azərbaycanda pandemiyaya cavab tədbirləri" layihəsi çərçivəsində ölkəmizdə ictimai səhiyyənin xidmət, təhsil və tədqiqat sahələrində töhfə verməsi planlaşdırılan, müxtəlif səhiyyə müəssisələrində fəaliyyət göstərən seçilmiş potensial qrup üzvləri iştirak edib. Təlim nəzəri və praktiki hissələrdən ibarət olub. Təlimlərin nəzəri hissəsində icma yönümlü sağlamlıq xidmətinin inkişaf tarixi, bu sahədə fəaliyyətin planlaşdırılması və qiymətləndirilməsi mövzuları barədə təqdimatlar dinlənilib.

Təlim kursunun praktiki hissəsində isə Hövsan ərazisinə səfər keçirilərək orada İYSX-nin təşkili ilə bağlı ümumi məlumat və müşahidə həyata keçirilib. Qrup işləri və sual-cavab sessiyaları vasitəsilə interaktiv şəkildə həyata keçirilmiş təlim kursunda ÜST-nin ekspertləri Bülent Kılıç, Belgin Ünal, Kevser Vatansever, Elif Dönmez və Öykü Turunç təlimçi qismində iştirak ediblər. Təlim kursu sertifikarların təqdim edilməsi və xatirə şəklinin çəkilməsi ilə yekunlaşıb.

Müəllif: Səadət Məmmədova