Ümumdünya Səhiyyə Təşkilatı (ÜST) epidemiyanın müşahidə olunduğu Uqandada Ebola virusuna qarşı hazırlanmış 3 fərqli peyvəndin sınaqlarına başlanacağını açıqlayıb.
Aztibb.az xəbər verir ki, ÜST-nin baş katibi Tedros Adhanom Qebreyesus G20 Liderlər Zirvəsi zamanı, ekspertlər komitəsinin 3 peyvəndin sınaqlarına başlamaq qərarına gəldiyini bildirib. Uqanda səhiyyə rəsmilərinin təklifi qəbul etdiyini qeyd edən Qebreyesus, peyvəndlərin gələn həftə ölkəyə göndəriləcəyini bildirib. Uqanda Səhiyyə Nazirliyi sınaqdan keçiriləcək peyvəndlər dən 2-nin İngiltərədə istehsal edilən Oksford peyvəndi və ABŞ-da istehsal edilən SAB-ın peyvəndi olduğunu açıqlamışdı.
Uqandada indiyədək epidemiyadan 55 nəfər ölüb. Ebola virusu ilk dəfə bu il sentyabrın 19-da Uqandada 24 yaşlı bir şəxsdə aşkarlanmışdı. Bir növ hemorragik qızdırmaya səbəb olan Ebola ilk dəfə 1976-cı ildə Sudanın Nzara və Konqo Demokratik Respublikasının Yambuku şəhərlərində eyni vaxtda yayılmışdı.