Sumqayıt Tibb Mərkəzinin (STM) Perinatal Mərkəzində 17 Noyabr - Beynəlxalq Vaxtından Əvvəl Doğulmuşlar Günü qeyd edilib.
STM-dən Aztibb.az-a bildirilib ki, Perinatal Mərkəzdə perinatal xidmətin konsepsiyasına uyğun olaraq hamiləliyin patologiya şöbəsi, neonatal reanimasiya və intensiv terapiya bölümü, yarımçıq və xəstə yenidoğulmuşlar şöbəsi, katamnestik izləm xidməti fəaliyyət göstərir.
Sumqayıt və ətraf regionlardan olan pasiyentlərə perinatal xidmət göstərilir. İcbari Tibbi Sığortanın tətbiq edilməsi tibbin bütün sahələri kimi perinatal xidmətin qarşısında da böyük imkanlar yaradır.
Sumqayıt Perinatal Mərkəzin rəhbəri Təranə Rəcəblinin adından səmərəli əmək fəaliyyətinə görə mərkəzin bir qrup əməkdaşı Fəxri fərmanla təltif edilib.
Qeyd edək ki, 2009-cu ildə Yeni Doğulmuş Uşaqlara Nəzarət üzrə Avropa Fondunun təşəbbüsü ilə noyabrın 17-də Beynəlxalq Vaxtından Əvvəl Doğulan Uşaqlar Günü təsis edilib. Hər il planetdə təxminən 15 milyon uşaq vaxtından qabaq doğulur.