Səhiyyə Nazirliyi İctimai Səhiyyə və İslahatlar Mərkəzində (İSİM) klinik protokollara dair "dəyirmi masa" keçirilib.

 

İSİM-dən verilən məlumata görə, tədbirdə səhiyyə mütəxəssisləri, Azərbaycan Dövlət Həkimləri Təkmilləşdirmə İnstitutunun həkim rezidentləri iştirak ediblər.

 

Tədbirin məqsədi iştrakçıları hər hansı bir xəstəlik, sindrom, klinik vəziyyət və ya klinik situasiya zamanı tibbi yardım göstərilməsi üzrə sübutlu təbabət prinsiplərinə əsaslanan klinik tövsiyələrlə tanış etmək idi.

 

İSİM-in direktor müavini Rahib Məmmədov bildirib ki, tədqiqatlara, müasir tibbi məlumatlara əsaslanaraq hazırlanan klinik rəhbərliklər həkim və digər səhiyyə işçiləri üçün səmərəli vəsait olmaqla yanaşı, həm də tibbi xidmətlərin keyfiyyətinin artırılmasında mühüm rol oynayır.

 

Mərkəzin Tibbi keyfiyyət standartları şöbəsinin müdiri Şəhla İsmayılova klinik protokollar və onların statusundan söz açaraq vurğulayıb ki, bu vəsaitlər əhalinin sağlamlığının qorunması istiqamətində həyata keçirilən tədbirlərə, eyni zamanda doğru qiymətləndirmə və monitorinq işinin aparılmasına, səhiyyə siyasətini müəyyən etməyə öz töhfəsini verir.

 

Daha sonra İSİM-in Tibbi keyfiyyət standartları şöbəsinin həkim-metodisti İlhamə Əlizadə iştrakçıları klinik protokolların tərtib olunması metodologiyası ilə tanış edib.

 

Sonda iştrakçıları maraqlandıran suallar cavablandırılıb və geniş fikir mübadiləsi aparılıb.