Azərbaycan Tibb Universitetinin (ATU) Tədris Terapevtik Klinikasında "Periferik yaxmaların diaqnostikada mühüm rolu" mövzusunda seminar keçirilib.
Tədbirdə klinikanın müalicə işləri üzrə direktor müavini Fəridə Hacıyeva, klinikanın həkimləri və rezidentləri iştirak ediblər.
Seminarda Klinikanın Laboratoriya şöbəsinin həkimi Elçin Şıxəliyev mövzu üzrə təqdimatla çıxış edib.
Həkim ilk öncə periferik yaxmaların hazırlanması qaydalarından bəhs edib. Daha sonra iştirakçılara slaydlar vasitəsilə qan hüceyrələrinin inkişaf ardıcıllıqları, periferik yaxmalarda normal və atipik hüceyrələr göstərilib.
E.Şıxəliyev 7 növ leykozlardan - tükhüceyrəli leykoz, kəskin promielositar leykoz, kəskin limfoblast leykoz, xroniki limfositar leykoz, kəskin mieloblast leykoz, xroniki mielositar leykoz, mieloproliferativ neoplazmalardan və eritrositopatologiyalardan anizositoz, poykilositoz, dakrositoz, akantositoz, sferositoz, hədəf hüceyrəli eritrositləri yaradan xəstəliklər barədə ətraflı məlumat verib.
Məruzəçi, həmçinin trombosit topalaşmasını periferik yaxma şəkilləri üzərində göstərərək diaqnoza nə qədər önəm daşıdığını izah edib.
Sonda mövzu ətrafında geniş müzakirələr aparılıb, E.Şıxəliyev iştirakçıların suallarını cavablandırıb.
