Noyabrın 21-də saat 10:00-da JW Marriott Abseron otelində “Kistik Fibroz Xəstələrinə Yardım” İctimai Birliyinin təşkilatçılığı ilə "Azərbaycanda kistoz fibrozda yeni dövr" mövzusunda tədbir keçiriləcək.
Bu barədə Aztibb.az-a “Kistik Fibroz Xəstələrinə Yardım” İctimai Birliyinin sədri Səadət Bayramova məlumat verib.
O, bildirib ki, tədbirin təşkilində məqsəd ölkəmizdə kistoz fibrozla bağlı tibb personalının maarifləndirilməsi, bu xəstəliklə bağlı diaqnostikanın və müalicənin təşkili, həmçinin əlaqədar qurumların iştirakı ilə ölkə xaricindən həkim qrupunun dəvət edilməsidir.
Səadət Bayramovanın sözlərinə görə, tədbirdə kistoz fibroz xəstəliyindən əziyyət çəkən vətəndaşların mövcud vəziyyəti, beynəlxalq təcrübə, yeni müalicə üsulları, həyati vacib dərman preparatları ilə təminatın davamlılığı və yaranan problemlərin həlli yolları müzakirə ediləcək. Tədbir çərçivəsində “Kistik Fibroz Xəstələrinə Yardım” İctimai Birliyi tərəfindən dəvət olunmuş pediatr, terapevt və pulmonoloqlara təlim keçiriləcək.
Qeyd edək ki, “Kistik Fibroz Xəstələrinə Yardım” İctimai Birliyi 5 ildir fəaliyyət göstərir. Qurum kistoz fibrozlu pasiyentlərin hüquqlarını müdafiə etməyi, həmçinin ictimaiyyət arasında bu xəstəliklə bağlı maarifləndirmə işləri aparmağı qarşısına məqsəd qoyub.
