Respublika Klinik Xəstəxanasında 8 Noyabr - Zəfər Günü və 9 Noyabr - Dövlət Bayrağı Gününə həsr olunmuş tədbir keçirilib.

Əvvəlcə ölkəmizin ərazi bütövlüyü və suverenliyi uğrunda mübarizədə canından keçmiş şəhidlərimizin xatirəsi bir dəqiqəlik sükutla yad edilib.

Tədbirdə bildirilib ki, artıq iki ildir Azərbaycan böyük Qələbə ilə 30 ilə yaxın Qarabağ həsrətinə son qoyub. Bu Qələbə təkcə işğal altında olan torpaqlarımızın azadlığı deyil, həm də Azərbaycan dövlətinin, siyasətinin və Ordusunun gücünün bütün dünyaya isbatı oldu.

Qeyd olunub ki, bu il artıq ikinci dəfədir ki, Dövlət Bayrağı Günü işğaldan azad edilən Azərbaycan torpaqlarında da qeyd olunur. Azad edilən torpaqlarımızda Azərbaycanın şanlı bayrağı ucaldılıb.

Daha sonra qazilərimiz çıxış edərək müharibə dövründə yaşadıqları hadisələrdən danışıb, onları yenidən həyata qaytaran, bugünkü yaşama səbəbkarları olan həkimlərə minnətdarlıqlarını bildiriblər. Onlar bu zəfəri təkcə əsgərlərin deyil, xalqın gücü, millətin xeyir-duası sayəsində qazandıqlarını vurğulayıblar.

Tədbir 44 günlük Vətən müharibəsində gecə-gündüz demədən çalışan həkimlərin çıxışları ilə başa çatıb.