Qərbi Afrika ölkələrindən olan Nigeriyada kolera epidemiyasında həyatını itirənlərin sayı 382-yə yüksəlib. 

Aztibb.az xəbər verir ki, Nigeriya Xəstəliklərə Nəzarət Mərkəzi (NCDC) ölkənin müxtəlif əyalətlərində xüsusilə güclü yağışların səbəb olduğu daşqınlardan sonra kolera epidemiyasının başladığını açıqlayıb. 

Yanvar ayından indiyədək ölkədə 11 820 nəfərdə kolera aşkarlanıb. Epidemiya nəticəsində həyatını itirənlərin sayı 382-yə yüksəlib. 

İnsanların nazik bağırsaqlarında “Vibrio” bakteriyasının parazitləşməsi nəticəsində yaranan kolera daha çox içməli su və çirklənmiş su ilə yuyulan qidalar vasitəsilə yoluxur. 

İshal, qarın ağrısı, şişkinlik və qusma kimi əlamətlərə səbəb olan bu bakteriyalar orqanizmə daxil olduqdan sonra 6-48 saat ərzində xəstəliyin yaranmasına səbəb olur.