Azərbaycan Respublikası Səhiyyə Nazirliyi, Tibbi Ərazi Bölmələrini İdarəetmə Birliyi (TƏBİB), İcbari Tibbi Sığorta üzrə Dövlət Agentliyinin dəstəyi, Elmi-Tədqiqat Kardiologiya İnstitutu (ETKİ) və Elmi-Tədqiqat Tibbi Bərpa İnstitutunun təşkilatçılığı ilə Zəfər Gününə həsr edilmiş "Kardiologiya və reabilitasiya: nailiyyətlər və perspektivlər" mövzusunda elmi konfrans keçirilib.

Əvvəlcə Azərbaycan Respublikasının Dövlət Himni səsləndirilib, şəhidlərin xatirəsi bir dəqiqəlik sükutla yad edilib.

Tədbirdə ETKİ-nin direktoru, prof. Gülnaz Dadaşova noyabrın 8-nin Azərbaycan tarixinə qızıl hərflərlə yazıldığını söyləyib. O, Prezident İlham Əliyevin apardığı siyasət və igid əsgərlərimizin göstərdiyi şücaət nəticəsində 30 illik torpaq həsrətimizə son qoyulduğunu qeyd edib. Gülnaz Dadaşova çıxışında bu qələbənin Azərbaycan üçün yeni dönəmin başlanğıcı olduğunu vurğulayıb.

Konfransda, həmçinin İcbari Tibbi Sığorta üzrə Dövlət Agentliyinin İdarə Heyəti sədrinin müavini Nigar Bayramova, TƏBİB-in Strateji İnkişaf departamentinin rəhbəri Yaqut Qarayeva, Türk Kardioloji Dərnəyinin sədri, prof. Vedat Aytekin, Mərkəzi Klinikanın baş həkimi, prof. Kamran Musayev, Milli Məclisin Səhiyyə Komitəsinin sədr müavini, ürək-damar cərrahı, t.e.d. Rəşad Mahmudov və Respublikanın baş kardioloqu, t. e.d. Yusif Nağıyev çıxış ediblər.

Ümumillikdə 4 paneldən ibarət olan tədbirdə 400-ə yaxın həkim iştirak edib. Konfrans Səhiyyə Nazirliyi tərəfindən 16 DTT balı ilə təsdiqlənib.

Tədbirə bir sıra tanınmış alimlər, eyni zamanda Türkiyədən alim-professor heyəti qoşulub. Konfransda təqdim olunan məruzələr böyük maraqla qarşılanıb və mövzulara dair çoxsaylı suallar cavablandırılıb.

Sonda iştirakçılara sertifikatlar təqdim edilib.

Qeyd edək ki, iki günlük konfrans çərçivəsində iştirakçılar üçün “Kardiak anatomiya“ və “CPR” kursları da təşkil olunub.