Mərkəzi Neftçilər Xəstəxanasının direktoru Musa Abbasov, xəstəxananın Vətən müharibəsində ön cəbhədə iştirak etmiş əməkdaşları - Telman Abbasov, Elşən Mehdiyev və xəstəxana kollektivi Zəfər Günü ərəfəsində İkinci Şəhidlər xiyabanını ziyarət ediblər.

Anım mərasimi zamanı Musa Abbasov qəhrəman və rəşadətli ordumuzun Azərbaycan Respublikasının Prezidenti, Müzəffər Ali Baş Komandanın rəhbərliyi ilə torpaqlarımızı düşməndən azad edərək tarixi ədaləti bərpa etdiyini diqqətə çatdırıb. 

Direktor Vətən müharibəsində Zəfər qazanılmasında şəhidlərimizin müstəsna xidmətlərini vurğulayaraq, onların xatirəsinin Azərbaycan xalqının qəlbində əbədi yaşayacağını bildirib.

Musa Abbasov qeyd edib ki, Mərkəzi Neftçilər Xəstəxanasının tibb heyəti Vətən müharibəsinin ilk günlərindən könüllü olaraq döyüş bölgələrinə yollanıb, 800-dən çox yaralı üzərində uğurlu cərrahi əməliyyatlar icra ediblər.

Daha sonra Vətən müharibəsi şəhidlərinin xatirəsi yad edilərək, məzarları üzərinə güllər düzülüb, şəhidlərin ruhuna dualar oxunub.