Azərbaycan Respublikası Səhiyyə Nazirliyinin İctimai Səhiyyə və İslahatlar Mərkəzinin (İSİM) mütəxəssisləri tərəfindən 25 oktyabr-3 noyabr tarixlərdə Bakı və Sumqayıt şəhərlərindəki internat məktəblərində sağlam həyat tərizinin təbliği üzrə maarifləndirici tədbirlər keçirilib.

Valideyn himayəsindən məhrum olmuş uşaqlar üçün 1 nömrəli Tam orta internat məktəbi, valideyn himayəsindən məhrum olmuş uşaqlar üçün 2 nömrəli Ümumi orta internat məktəbi, sağlamlıq imkanları məhdud uşaqlar üçün 2 nömrəli Xüsusi internat məktəbi, sağlamlıq imkanları məhdud uşaqlar üçün 3 və 5 nömrəli Respublika Xüsusi internat məktəbi, E.Mirzəyev adına sağlamlıq imkanları məhdud uşaqlar üçün 6 nömrəli Respublika Xüsusi internat məktəbi, 8 və 10 nömrəli Sanatoriya tipli internat məktəbi, E.Quliyev adına sağlamlıq imkanları məhdud uşaqlar üçün 9 nömrəli Xüsusi internat məktəbi, 11 nömrəli İnteqrasiya təlimli internat məktəbi, Sumqayıt şəhər internat tipli gimnaziya və M.Əsədov adına İnteqrasiya təlimli internat tipli gimnaziya şagirdləri zərərli vərdişlərə qarşı, qurd xəstəlikləri, sağlam qidalanma, ağız boşluğunun gigiyenası, kobud davranış və digər mövzular üzrə faydalı məlumatlar, tövsiyələr əldə ediblər.

“Uşaqların icbari dispanserizasiyadan keçirilməsinə dair 2018-2022-ci illər üçün Dövlət Proqramı"nın icrası ilə bağlı təşkil olunan tədbirlərdə İSİM-in mütəxəssisləri Ülkər Camalova, Lətafət Dadaşova, Zümrüd Kazımova, Pərvin Quliyeva və Gülnarə Cəfərova geniş təqdimatla çıxış edərək, iştirakçılara sağlamlığın qorunması istiqamətində ətraflı məlumat veriblər.

Tədbirlərin yekununda iştirakçıları maraqlandıran suallar cavablandırılıb və onlara İSİM tərəfindən hazırlanaraq çap edilmiş maarifləndirici materiallar təqdim olunub.