Azərbaycan Tibb Universitetinin (ATU) rəhbərliyi ilə müəssisənin Qarabağ müharibəsi şəhidlərinin ailə üzvləri olan əməkdaşları arasında görüş keçirilib.

Görüşdə ATU-nun rektoru, professor Gəray Gəraybəyli Zəfər Günü ərəfəsində hər kəsin ikili hisslər keçirdiyini, həm sonsuz qürur, həm də şəhidlərimiz üçün kədərləndiyini bildirib. O, ATU-nun məzunları arasında 18 şəhidin olduğunu qeyd edərək onların xatirəsinin daim qəlblərimizdə yaşayacağını deyib.

Rektor qeyd edib ki, 30 ildir həsrətində olduğumuz torpaqlarımız məhz bu gənclərin şücaəti, yenilməzliyi sayəsində azad olunub. Ali Baş Komandan, Prezident İlham Əliyevin illərdir apardığı müdrik siyasət nəticəsində yetişən bu vətənpərvər nəslin nümayəndələri xalqın azadlı naminə öz canlarını fəda veriblər.

Professor Gəray Gəraybəyli universitet əməkdaşları arasında şəhid ailəsi üzvlərinin daim rəhbərliyin diqqət mərəzində olduğunu, onların sosial problemlərinin həllinə yardım göstərməyə hazır olduqlarını bildirib.

Qeyd edək ki, görüşdə hər iki Qarabağ müharibəsinin şəhidlərinin ailə üzvləri və universitetin prorektorları iştirak ediblər.

Sonda şəhid ailə üzvlərinə ATU rəhbərliyi adından hədiyyələr təqdim olunub.