Əvvəlcə Vətən müharibəsi şəhidlərinin əziz xatirəsi bir dəqiqəlik sükutla yad olunub.

 

Görüşdə KTM-in direktoru Könül Ələkbərov çıxış edərək şəhid ailələri və qazilərə dövlət səviyyəsində hər zaman yüksək diqqət və qayğı göstərildiyini bildirib. O, hazırda Mərkəzdə 40-dan çox şəhid və qazi ailəsindən olan şəxsin fəaliyyət göstərdiyini deyib.

 

Daha sonra Birinci və İkinci Qarabağ müharibəsi iştirakçısı olan Vidadi Ağagülov çıxış edərək şəhid ailələri və qazilər üçün yaradılmış şəraitə görə xəstəxana rəhbərliyinə təşəkkür edib. Bildirib ki, hazırda Kliniki Tibbi Mərkəzdə 10-larla qazinin müalicəsi davam edir. Burada həssas təbəqəyə aid olan insanlara xüsusi qayğı göstərilir: "Vətən torpaqları uğrunda apardığımız savaş sayəsində ərazi bütövlüyümüz bərpa olunub. Allah şəhidlərimizə rəhmət eləsin, qazilərimizin isə tezliklə sağlamlıqlarına qovuşmalarını arzu edirəm”.

 

Tədbirdə çıxış edənlər Azərbaycan tarixinin şərəfli səhifələrindən olan Vətən müharibəsində Prezident, Ali Baş Komandan İlham Əliyevin rəhbərliyi ilə qazanılan Zəfərdən və bu şanlı Qələbədə şəhidlərimizin, əsgər və zabitlərimizin qəhrəmanlığından danışıblar.

 

Sonda tədbirdə iştirak edən şəhid ailələri, qazi və qazi ailələrinə hədiyyələr təqdim edilib.