Azərbaycan Respublikası Səhiyyə Nazirliyinin İctimai Səhiyyə və İslahatlar Mərkəzi (İSİM) tərəfindən Bakı şəhəri 171 nömrəli tam orta məktəbdə maarifləndirici tədbir keçirilib.

 

Bu barədə Aztibb.az-a İSİM-dən bildirilib.

 

“Uşaqların icbari dispanserizasiyadan keçirilməsinə dair 2018-2022-ci illər üçün Dövlət Proqramı"nın icrası ilə bağlı təşkil olunan tədbirdə məqsəd məktəbliləri sağlam qidalanma və onurğa xəstəlikləri ilə bağlı məlumatlandırmaq olub.

 

Tədbirdə İSİM-in Səhiyyə kommunikasiyası şöbəsinin əməkdaşı Gülnarə Cəfərova “Məktəbli uşaqların qidalanması” mövzusu üzrə təqdimatla çıxış edib. O, uşaq və yeniyetmələrin sağlam qidalanmasının əhəmiyyətindən söz açıb, gənc nəslin düzgün və balanslı qidalanması ilə bağlı tövsiyələri nəzərə çatdırıb.

 

İSİM-in həkim-metodisti Zümrüd Kazımova “Düzgün qamət. Skoliozun profilaktikası” mövzusunda geniş təqdimatla çıxış edərək, məktəbyaşlı uşaqlarda bu problemə daha çox rast gəlinmə səbəblərini izah edib və onlara tövsiyələr verib.

 

Yekunda iştirakçıları maraqlandıran suallar cavablandırılıb, onlara İSİM tərəfindən hazırlanaraq çap edilmiş maarifləndirici materiallar təqdim olunub.