Birinci Qarabağ müharibəsində iştirak edən Dövlət Gömrük Komitəsinin Tibbi Xidmət İdarəsinin Mərkəzi Hospitalının Təcili Tibbi Yardım şöbəsinin sürücüsü Adil Behbudovu tanıyaq.
Adil Behbudov 1992-ci ildə Qarabağ müharibəsi zamanı peşəkar hərbçi kimi cəbhəyə yollanıb. O, Milli Ordunun N saylı Hərbi hissəsinin əsgəri olaraq döyüş bölgələrində hərbi qulluğu davam etdirib. Müharibə zamanı 1992-1994-cü illərdə Ağdam rayonunda, Şuşa şəhərində, Murovdağda yerləşən postlara və şiddətli döyüşlər gedən digər ərazilərə ezam olunub.
Adil Behbudov döyüş bölgələrində aldığı xəsarət səbəbindən 1994-cü ilin sonunda kapitan rütbəsi ilə ehtiya çıxıb.
Qürurverici haldır ki, Adil Behbudov İkinci Qarabağ müharibəsi zamanı da əsgər kimi Hadrud, Cəbrayıl, Xocavənd, Fizulu, Şüşa və Laçın uğrunda gedən döyüşlərdə iştirak edib. Azərbaycan Respublikasının Prezidenti İlham Əliyevin Sərəncamı ilə Xocavənd, Fizuli, Laçın və “Vətən uğrunda” medalları ilə təltif olunub.
Qeyd edək ki, Adil Behbudov 1983-1987-ci illərdə Azərbaycan Ali Hərbi Məktəbində təhsil alıb. O, məktəbi bitirdikdən sonra 1987-ci ildə Ukraynanın Dnepropetrovsk vilayətində N saylı Hərbi hissədə motoatıcı tağım komandiri kimi fəaliyyət göstərib. Həmçinin 1988-ci ilin aprel ayından avqust ayına qədər Ukraynada Çernobıl Atom Elektrik Stansiyasında baş verən qəzanın fəsadlarının aradan qaldırılmasında yaxından iştirak edib. Adil Behbudov 1989-cu ildə Azərbaycana təyinat alaraq Şəmkir rayon Hərbi Kommissarlığının ikinci şöbənin rəis müavini çalışıb. 2011-ci ildən Mərkəzi Gömrük Hospitalında Təcili Yardım şöbəsinin sürücüsü kimi fəaliyyət göstərir.