Bu günlərdə Daşkənd şəhərində Özbəkistan Bariatrik Metabolik Cərrahlar Dərnəyinin ilk beynəlxalq konfransı keçirilib. Toplantıda Azərbaycan Tibb Universitetinin I Cərrahi xəstəliklər kafedrasının əməkdaşı, tanınmış cərrah, tibb üzrə fəlsəfə doktoru Tariyel Ömərov da iştirak edib.

Beynəlxalq tədbirdə Tariyel Ömərov "Mədənin boylama rezeksiyası əməliyyatının standartları” mövzusunda məruzə ilə çıxış edib. O, bu sahədə son illərdə əldə edilən nailiyyətləri tədbir iştirakçıları ilə bölüşüb.

Azərbaycanlı həkim qeyd edib ki, mədənin boylama rezeksiyası əməliyyatı digər metodlarla müqayisədə daha asan və yeni başlayan cərrahlar üçün praktik tətbiq olunan bir əməliyyatdır. Məruzəçi, həmçinin indiyədək müxtəlif beynəlxalq patentləri alan “Aşırı piylənməsi olan xəstələrdə bariatrik-metabolik cərrahi müalicənin optimallaşdırılması” metodu barədə də məlumat verib.

Tariyel Ömərov beynəlxalq konfransın Braziliya, Türkiyə, ABŞ, Rusiyadan olan cərrah və professorların qatıldığl iki elmi panelində moderator qismində çıxış edib. O, həmçinin konfransın  canlı əməliyyat panelində moderator kimi təmsil olunub.