Azərbaycan Respublikası Səhiyyə Nazirliyinin İctimai Səhiyyə və İslahatlar Mərkəzi (İSİM) tərəfindən Bakı şəhəri 21 nömrəli tam orta məktəbdə maarifləndirici tədbir keçirilib.

 

 

İSİM-dən Aztibb.az-a verilən məlumata görə, “Uşaqların icbari dispanserizasiyadan keçirilməsinə dair 2018-2022-ci illər üçün Dövlət Proqramı"nın icrası ilə bağlı təşkil olunan tədbirdə məqsəd məktəbliləri sağlam qidalanma və onurğa xəstəlikləri ilə bağlı məlumatlandırmaqdır.

 

Tədbirdə Səhiyyə kommunikasiyası şöbəsinin əməkdaşı Gülnarə Cəfərova “Məktəbli uşaqların qidalanması” mövzusu üzrə təqdimatla çıxış edərək uşaq və yeniyetmələrin sağlam qidalanmasının əhəmiyyətindən danışıb, gənc nəslin düzgün və balanslı qidalanması ilə bağlı tövsiyələri nəzərə çatdırıb.

 

Səhiyyə Nazirliyin İctimai Səhiyyə və İslahatlar Mərkəzinin həkim-metodisti Zümrüd Kazımova “Düzgün qamət. Skoliozun profilaktikası” mövzusunda geniş təqdimatla çıxış edib. Bildirib ki, məktəbyaşlı uşaqlarda bu problemə daha çox rast gəlinməsi ağır çantaların birtərəfli daşınması, fiziki fəallığın az olması ilə bağlıdır. Məktəblilərə sağlam həyat tərzi sürmək, düzgün qidalanmaq, fiziki aktiv olmaq tövsiyə olunub.

 

Yekununda iştirakçıları maraqlandıran suallar cavablandırılıb və onlara İSİM tərəfindən hazırlanaraq çap edilmiş maarifləndirici materiallar təqdim edilib.