"Uşağın zorla, məcburi şəkildə yedizdirilməsi onun sağlam böyüməsi demək deyil. Bu, sonrakı yaşlarda daha böyük problemə səbəb ola bilər. Valideyn tərəfindən uşağın müxtəlif üsullarla şirnikləndirərək yedizdirilməsi tamamilə yanlışdır". 

 

Aztibb.az xəbər verir ki, bunu Tərtər Rayon Mərkəzi Xəstəxanasının həkim-pediatrı Hicran Rəhimli deyib.

 

Onun sözlərinə görə, doyandan sonra uşağa əlavə nəsə yedizdirmək də doğru deyil. Uşaq nə qədər çox hərəkət etsə, fiziki yorğunluq olsa, o qədər də yeməyə çox ehtiyac duyacaq: "Evdə oturan, fiziki hərəkətlər etməyən və ya az hərəkət edən uşaq acmayacaq, ya zəif yeyəcək, ya da yeməkdən imtina edəcək. Ona görə də, ilk növbədə, uşağın fiziki hərəkətli olmasına fikir vermək və uşağın yaşına uyğun olaraq hərəkət etmək lazımdır. Bir uşağın başqa bir uşaqla müqayisə edilməsi düzgün deyil”.

 

Hicran Rəhimli bildirib ki, uşağın sağlam böyüməsi üçün onun tez-tez yedizdirilməsinə deyil, özü istədiyi qədər yeməsinə üstünlük verilməlidir.