Aztibb.az xəbər verir ki, bu barədə Bəhram Bağırzadənin müalicə edildiyi Mərkəzi Gömrük Hospitalının müalicə işləri üzrə sədr müavini Bəxtiyar Musayev deyib. Onun sözlərinə görə, xəstə bir neçə gündür spontan tənəffüsdədir.

 

"Bu gündən başlayaraq süni nəfəs aparatının müvəqqəti qapadılması, yəni tənəffüsün fizioloji yolla burundan və ağızdan alınması yoxlanılacaq. Bir neçə dəfə yoxlamalar aparıldıqdan sonra aparatın çıxarılması da mümkün olacaq. Müşahidə edilən miopotiya əlamətləri də xeyli geriləyib. Onlara qarşı müvafiq müalicə aparılır".

 

B.Musayev bildirib ki, xəstə aktivdir, oturur, ayağa qalxır. Bu gün səhər isə ailə üzvləri ilə telefonla danışıb.

 

Xatırladaq ki, daha əvvəl koronavirus xəstəliyindən müalicə olunduğu xəstəxanadan iyunun 13-də Mərkəzi Gömrük Hospitalının Reanimasiya şöbəsinə köçürülən Əməkdar artist Bəhram Bağırzadənin ağciyər toxumasının 90%-dən çox zədələndiyi məlum olmuşdu. Mərkəzi Gömrük Hospitalının cərrahları və reanimatoloqları təcili olaraq konsilium keçirib və xəstənin EKMO cihazına qoşulmasına qərar vermişdi. Xəstə EKMO cihazına qoşulduqdan sonra onun vəziyyəti nisbətən stabilləşmiş və saturasiya 95 faizə qədər yüksəlmişdi. Əməkdar artist iyulun 2-də EKMO-dan ayrılıb.