Livanın Səhiyyə Nazirliyi oktyabrın 6-dan başlayaraq ölkənin şimalında yayılan vəba epidemiyasının ağır fəsadlar doğurduğunu bildirib.

Aztibb.az xəbər verir ki, nazirliyin məlumatında son günlər 14 vəba xəstəsinin vəfat etdiyi qeyd olunub. Bundan başqa, son iki gün ərzində daha 110 nəfər bu xəstəliyə tutulub və xəstələrin ümumi sayı 913-ə çatıb. Məlumatda vəba epidemiyasının Livanın Akkar və Trablusşam şəhərlərində, həmçinin Baalbek vilayətində tüğyan etdiyi bildirilib.

Livanın Səhiyyə Nazirliyi qeyd edib ki, ölkədə vəba xəstəliyi son dəfə 1993-cü ildə qeydə alınmışdı. Hazırkı epidemiyanın səbəbi isə içməli su mənbələrinin həddindən artıq çirklənməsidir.