Sumqayıt Tibb Mərkəzinin (STM) 1 nömrəli Şəhər Xəstəxanasının Poliklinika şöbəsində böyük tibb və əməliyyat blokunun tibb bacılarının iştirakı ilə maarifləndirici seminar keçirilib.

STM-in Tibb bacıları şöbəsinin təşkilatçılığı ilə keçirilən seminarda xəstəxana daxili infeksiya riskini azaltmaq üçün əl təmizliyi ilə bağlı gigiyenik qaydalar haqqında geniş məlumat verilib. Bununla yanaşı, əməliyyat blokunun dezinfeksiyası üçün ümumi qaydalardan bəhs edilib.

1 nömrəli Şəhər Xəstəxanasının Əməliyyat blokunun böyük tibb bacısı Aytən İsalı, xəstəxananın İnfeksion nəzarət komissiyasının sədri Könül Cəfərova sözügedən mövzularda çıxış ediblər, praktik nümunələr göstəriblər.

Qarşılıqlı fikir mübadiləsi şəraitində keçən seminarda iştirakçıları maraqlandıran suallar cavablandırılıb.

Sonda STM-in Tibb bacıları şöbəsinin rəhbəri Qızılgül Bünyatova çıxış edərək bildirib ki, tibb bacılarının maarifləndirilməsi, eləcə də bilik və bacarıqlarının artırılması istiqamətində müxtəlif mövzuları əhatə edən seminarlar davam etdiriləcək.

Sumqayıt Tibb Mərkəzi