Ana ölümlərinin qarşısının alınması məqsədilə Lənkəran rayonunda “Azərbaycanın cənub bölgəsində təhlükəsiz analıq” pilot layihəsinin icrasına start verilib.

 

İki il davam edən layihə çərçivəsində Lənkəran rayonunda ana ölümlərinin azaldılması istiqamətində bir sıra qabaqcıl strategiyaların tətbiqi nəzərdə tutulur. Pilot layihə mərkəzləşdirilmiş doğum şöbələri olan bir neçə yerli tibb müəssisəsində həyata keçiriləcək. Layihənin əsas fəaliyyətlərinə tibb personalının potensialın artırılması, klinik protokolların və metodik vasitələrin yenilənməsi üçün tövsiyələrin hazırlanması, eləcə də əhali arasında maarifləndirmə və təşviqat işinin təşkili daxildir.

 

Layihənin ilk mərhələsində Elmi-Tədqiqat Mamalıq və Ginekologiya İnstitutunun ekspert qrupu Lənkəran rayon Perinatal Mərkəzində və Ailə Sağlamlıq Mərkəzində maddi-texniki təchizat bazasının yoxlanılması, daha sonra isə bu tibb müəssisələrinin tibb heyətinin bilik və bacarıqlarının artırılması istiqamətində silsilə tədbirlər həyata keçirəcək.

 

Pilot layihənin birinci mərhələsi 2022-ci ilin sonuna qədər icra olunacaq.