Qızdırmanı salmaq üçün və ağrıkəsici kimi istifadə edilən, tədarükü çətin olan parasetamol tərkibli dərmanların satışını azaltmaqla bağlı Fransada çağırış edilib.
Aztibb.az "France 24"ə istinadən xəbər verir ki, Fransada iyul ayından etibarən tərkibində parasetamol olan dərmanların təchizatında problemlər yaranıb. Bu kontekstdə tədarükdə fasilələrin qarşısını almaq məqsədilə Milli Dərman Agentliyi (ANSM) əczaçılar, həkimlər və xəstələr üçün tərkibində parasetamol olan dərmanların istifadəsi və satışı ilə bağlı tövsiyələrin yer aldığı bəyanat yayıb.
Açıqlamada vətəndaşlardan sözügedən dərmanları ehtiyatda saxlamamaları istənilib. Bu dərmanların reseptsiz qəbulu halında 2 qutunun məhdudlaşdırılması tövsiyə olunub. Əczaçılar müəyyən qaydalar çərçivəsində tərkibində təyin olunduğundan daha az parasetamol olan dərmanlar verə biləcəklər. Həkimlərdən dərhal ehtiyacı olmayan xəstələrə tərkibində parasetamol olan dərmanlar yazmamaları xahiş olunub. Bundan əlavə, həkimlərə sözügedən dərmanları lazım gəldikdə gündə 4 dəfə deyil, 3 dəfə yazmaq tövsiyə olunub.