21-22 oktyabr 2022-ci il tarixlərində Moskvada N.V. Sklifosovski adına Təcili Yardım Elmi-Tədqiqat İnstitutunun təşkilatçılığı və beynəlxalq iştirakla “Yubiley Lujnikov qiraətləri. Klinik toksikologiyanın inkişaf mərhələləri və perspektivləri.” mövzusunda elmi-praktik konfrans keçirilib. Elmi-praktik konfrans SSRİ-də klinik toksikologiyanın banisi, akademik Yevgeni Alekseyeviç Lujnikovun xatirəsinə həsr olunub.
Hibrid formatda keçirilən tədbirdə MDB-nin 6 ölkəsindən 100-dən çox mütəxəssis iştirak edib, klinik toksikologiyanın elmi və praktik ixtisas kimi inkişafının aktual məsələləri, toksikoloji xidmətin təşkili, kimyəvi zədələrin etiologiya və patogenezinə müasir baxışlar, kəskin və xroniki zəhərlənmələrlə xəstələrin diaqnostika, müalicə və reabilitasiyasına yeni yanaşmalar, bu ixtisas üzrə kadr hazırlığı problemləri müzakirə olunub.
Azərbaycan Toksikoloqlar Cəmiyyətinin sədri, Avropa Toksikoloji Mərkəzlər və Klinik Toksikoloqlar Assosiasiyasının üzvü dos. İsmayıl Əfəndiyev tədbirdə “Azərbaycan Toksikoloji Xidməti: tarixi, hazırkı vəziyyəti və inkişaf perspektivləri” mövzusunda məruzə ilə çıxış edib.
Dos. İ.Əfəndiyevin məruzəsi böyük maraqla qarşılanıb və tədbirin peşəkar auditoriyası tərəfindən müsbət rəy alıb.
