Bu gün ABŞ-ın Beynəlxalq İnkişaf Agentliyinin (USAID) maliyyə dəstəyi ilə Ümumdünya Səhiyyə Təşkilatının (ÜST) ölkə ofisinin həyata keçirdiyi “Azərbaycanda pandemiyaya cavab tədbirləri” layihəsinin 8 günlük “Təməl müəllim inkişafı” mövzusunda təlim proqramına başlanılıb. Azərbaycan Dövlət Həkimləri Təkmilləşdirmə İnstitutunda (ADHTİ) təşkil olunan proqrama institutun 10 müəllimi cəlb edilib.
Aztibb.az ÜST-nin Azərbaycandakı nümayəndəliyinin rəsmi feysbuk səhifəsinə istinadla bildirir ki, təlim proqramı iştirakçıların təhsildə liderlik, tədris proqramlarının yaradılması, kiçik və böyük qruplarda tədris, xəstəxana şəraitində tədrisin təşkili, qiymətləndirmənin müasir metod və prinsipləri, effektiv geribildirim və tədrisə dair digər bilik və bacarıqlarının artırılması məqsədi daşıyır. Proqram çərçivəsində, həmçinin iştirakçılar yeni əldə etdikləri bacarıqları tətbiq etməklə nümunə təlim sessiyaları keçəcəklər.
Hazırkı təlimlər bu ilin iyun ayında keçirilən oxşar təlim proqramının davamıdır. ÜST-nin ekspertləri ilə yanaşı ADHTİ-nin həmin proqramı bitirən 3 müəllimi də hazırkı proqram çərçivəsində həmkarlarına təlim keçir. Təlim iştirakçılarının ADHTİ-dəki tədris fəaliyyətlərini davam etdirməsi ilə əldə etdikləri bilik və bacarıqları yüzlərlə digər həmkarı ilə paylaşması gözlənilir. ÜST və USAID layihəni Səhiyyə Nazirliyi, İcbari Tibbi Sığorta üzrə Dövlət Agentliyi və Tibbi Ərazi Bölmələrini İdarəetmə Birliyi (TƏBİB) ilə birgə icra edilir.