Sumqayıt Tibb Mərkəzi (STM) müxtəlif mövzuları əhatə edən təlimlərə start verir.

Aztibb.az-ın xəbərinə görə, ilk belə təlim STM-in Uşaq xəstəxanasında keçirilib.

Xəstəxananın tibbi heyətinin iştirak etdiyi təlimdə STM-in Keyfiyyətə nəzarət şöbəsinin müdiri Dünya Hüseynova "Ümumi standart 3. Müayinə nümunələrinin toplanması və daşınması qaydaları" mövzusunda təqdimatla çıxış edib.

D.Hüseynova bildirib ki, xəstəxana tərəfindən müayinə üçün nümunələrin toplanması, identifikasiyası, istifadə olunması, təhlükəsiz daşınması və məhv edilməsi qaydaları müəyyənləşdirilməli və həyata keçirilməlidir.

O, qeyd edib ki, səhv nümunə alınmalarının, ağırlaşmaların qarşısını almaq üçün nümunə, düzgün qaydada götürülməli, kifayət miqdarda olmalı və laboratoriyaya etibarlı şəkildə çatdırılmalıdır.

Vurğulayıb ki, tibb müəssisələrinin böyük tibb bacıları nümunə almanı prosedura uyğun həyata keçirməlidir. Şöbələrin böyük tibb bacıları pasiyentlə işləyən tibb bacılarının bu prosedura uyğun təlimatlandırılmasına cavabdehlik daşıyır.

Qarşılıqlı fikir mübadiləsi şəraitində keçən təlimdə iştirakçıları maraqlandıran suallar cavablandırılıb.

Bu kimi silsilə təlimlərin davamlı olaraq keçiriləcəyi diqqətə çatdırılıb.