Mərkəzi Gömrük Hospitalının İnfeksiya Nəzarəti Komissiyasının sədri Səttar Yaqubov 10-14 oktyabr 2022-ci il tarixlərində Türkiyənin Ankara şəhərində keçirilən “Azərbaycanda Xəstəxanadaxili İnfeksiyaların Profilaktikası və Nəzarəti” mövzusu üzrə praktik təkmilləşmə proqramında iştirak edib.
Praktik təkmilləşmə proqramının məqsədi bu sahədə 40 ilə yaxın təcrübəsi olan qardaş Türkiyənin Xəstəxanadaxili İnfeksiyaların Profilaktikası və İnfeksiyalara Nəzarət sahəsində əldə etdiyi böyük təcrübədən yararlanaraq respublikamızın tibb müəssisələrində xəstəxanadaxili infeksiyalarla mübarizə işinin Ümümdünya Səhiyyə Təşkilatının proqramı və tövsiyələrinə uyğun şəkildə təşkil edilməsi idi.
Proqramın ilk günü Türkiyə Səhiyyə Nazirliyinin Xalq Sağlığı Müdürlüyündə, ikinci günü Gülhanə Eyitim Araşdırma Xəstəxanasında, üçüncü günü Ankara Onkoloji Eyitim Araşdırma Xəstəxanasında, dördüncü günü 29 may Dövlət Xəstəxanasında və beşinci günü “New Park Hotel” mehmanxanasının konfrans salonunda keçirilib. Tədbirdə Türkiyənin aparıcı mütəxəssisləri tərəfindən infeksiyaların mənbəyi, yayılma yolları, əl gigiyenası ilə bağlı keçirilən tədbirlər, tibb bacılarının gündəlik olaraq gördüyü işlər, etdikləri nəzarət, apardıqları müşahidələr və bu müşahidələr nəticəsində aparılan qeydiyyatlar barədə danışılıb.
Həmçinin proqramda xəstəxanaya işə yeni qəbul olunan işçilərin işə götürülməzdən öncə geniş tibbi müayinələrdən keçməsi, uzman həkimlər, internlər, tibb personalı və xəstəxanaya işə yeni qəbul olunanlar üçün keçirilən təlimlər barədə, onkoloji xəstəlikləri səbəbindən immun sistemi zəifləmiş bu xəstə kontingentinin hospital infeksiyalarından qorunması məqsədi ilə görülən işlər barədə ətraflı məlumat verilib.
