Azərbaycan Tibb Universiteti və Bakı Tibb Kolleclərinin tələbələri Avropa İttifaqının (Aİ) maliyyələşdirdiyi və Ümumdünya Səhiyyə Təşkilatının (ÜST) həyata keçirdiyi COVID-19 əleyhinə Vaksinasiyaya Dəstək layihəsi çərçivəsində müxtəlif fəaliyyətlərdə aktiv iştirak edir.

Belə ki, 1 saylı Bakı Tibb Kollecinin tələbəsi Leylaxanım Kərimli 24-30 aprel 2022-ci il tarixlərində Avropa İmmunlaşdırma Həftəsi ilə əlaqədar olaraq Şamaxı rayonunun 6 kəndində layihə çərçivəsində keçirilən immunlaşdırma kampaniyasında iştirak etmiş ən fəal gənclərdən biridir. O, kampaniya çərçivəsində əhali arasında COVID-19 və uşaq peyvəndlərinə dair maarifləndirmə işləri, yetkin insanların və uşaqların vaksinasiyası, həmçinin əhalinin sağlamlıq risklərinin qiymətləndirilməsi və uşaqların boy və çəki monitorinqi kimi fəaliyyətlər aparıb. Leylaxanım digər tələbələrlə birgə kənd sakinlərinə baş çəkərək peyvəndləmədən kənarda qalan uşaqları, peyvənd olunmamış yaşlı şəxsləri peyvənd olunmağa, habelə ürək xəstəlikləri risk amillərinin müəyyənləşdirilməsi üçün skrininq testindən keçməyə dəvət edən irimiqyaslı aksiyanın fəallarındandır.

Leylaxanım Kərimli “Avropa gənclər ili” çərçivəsində Avropa İttifaqı tərəfindən keçirilən kampaniyanın simalarından biridir.