"Zəfər həkimlərimiz"dən biri də Sumqayıt Tibb Mərkəzinin Uşaq xəstəxanasının poliklinika şöbəsinin oftalmoloqu Ramin Xəlilovdur.

44 günlük Vətən Müharibəsinin iştirakçısı olan R.Xəlilov oktyabrın 24-dən dekabrın 31-dək Füzuli-Xocavənd istiqamətində yaralı əsgər və zabitlərin sağlamlıqlarına qovuşmaları üçün yardım edib.

R.Xəlilov həmin günləri belə xatırlayır:

"Oktyabrın 24-də cəbhə bölgəsinə yola düşdüm. "Həmlə" taborunda xidmət edirdim. Taborun həkimi, kapitan Anar Məmmədov döyüşdə şəhid olmuşdu. Mən taborun tibbi xidmət rəisi təyin edildim. Xidmət etdiyim tabor birbaşa döyüş əməliyyatlarında iştirak edirdi. Düşmənin daim atəş nöqtəsi altındaydıq. Yaralıları döyüş meydanından çıxarıb, evakuasiya edərək ilkin tibbi yardım göstərirdim.

Orada olduğum müddətdə düşmənlə qızğın döyüş əməliyyatlarında da yaxından iştirak edirdim. Döyüşlərdə taborumuzun şəhid və yaralıları var idi.

Noyabrın 8-də belə döyüşlərin birində komandirimizə yardım etmək lazım idi. Xocavəndin Tuğ kəndi istiqamətinə yol aldıq. Yaxınlıqda ermənilərin hərbi hissəsi var idi. Həmin əraziyə yaxınlaşarkən hərəkət etdiyimiz yolun topla vurulduğunu gördük. Dağınıq yoldan keçmək istəyərkən maşınımız qəzaya uğradı. Maşın iki dəfə çevrildi və əkin sahəsinə düşdü. Çox ağır travma aldım. Çətinliklə də olsa maşından çıxa bildik. Ərazi atəş altındaydı. Mövqelərimizə doğru irəlilədik. Şiddətli ağrılarım olduğuna baxmayaraq hospitala getmədim və xidmətimi davam etdirdim.

Müharibə bitdikdən sonra arxa cəbhəyə evakuasiya olundum. Məni öncə Saatlı Rayon Mərkəzi Xəstəxanasına, oradan isə "Sumqayıt Hospital"a "Qapalı kəllə beyin travması, boynun və yuxarı ətraf yumşaq toxumaların əzilməsi" diaqnozu ilə təxliyə etdilər.

Müalicə aldıqdan sonra 31 dekabr 2020-ci ilədək həmin hərbi hissədə xidmətimi davam etdirmişəm və həmin günü ordudan tərxis olunmuşam.

Çətin günlər idi. Qorxmadan, çəkinmədən çalışırdıq ki, yaralılarımıza kömək edək, onlara məlhəm olaq.

Qəhrəman oğullarımız çox idi. Ağır yaralansalar da, geri qayıtmaq, vuruşmaq istəyirdilər.
Allah xalqımızı həmişə qalib, müzəffər etsin!"