Ana ölümlərinin qarşısının alınmasına töhfə vermək məqsədilə Lənkəran rayonunda həyata keçirilməsi planlaşdırılan “Azərbaycanın cənub bölgəsində təhlükəsiz analıq” pilot layihəsinin icrasına hazırlıq məsələlərini müzakirə etmək üçün BMT-nin Əhali Fondunun (UNFPA) Azərbaycan nümayəndəliyində layihə tərəfdaşlarını bir araya gətirən dəyirmi masa keçirilib.

 

Aztibb.az xəbər verir ki, görüşdə Səhiyyə Nazirliyinin İctimai Səhiyyə və İslahatlar Mərkəzi, Səhiyyə Nazirliyinin Respublika QİÇS-lə Mübarizə Mərkəzi, İcbari Tibbi Sığorta üzrə Dövlət Agentliyi, Elmi-Tədqiqat Mamalıq və Ginekologiya İnstitutu və UNFPA-nin nümayəndələri iştirak ediblər.

İki il ərzində davam edəcək layihə çərçivəsində ana ölümünün azaldılması istiqamətində Lənkəran rayonunda fəaliyyət göstərən tibbi heyətin və tibb müəssisələrinin potensialının artırılması, klinik protokolların və metodik vəsaitlərin yenilənməsi üçün tövsiyələrin hazırlanması, uşaqlıq boynu xərçəngi və İİV üzrə müayinələrin aparılmasına dair metodik vəsaitlərin hazırlanması, maarifləndirmə və təbliğat işlərinin həyata keçirilməsi və s. fəaliyyətlərin icrası nəzərdə tutulur.