Elmi-Tədqiqat Tibbi Bərpa İnstitutunda müəssisənin Kurortologiya şöbəsinin baş elmi işçisi, Əməkdar həkim, tibb üzrə fəlsəfə doktoru Sevda Nəsrullayevanın ad günü qeyd olunub.
Bu münasibətlə keçirilən tədbirdə institutun direktoru Pərvin Əkbərov və həkim kollektivi Sevda xanımı təbrik edib, ona can sağlığı və gələcək fəaliyyətində uğurlar arzulayıblar.
Qeyd edək ki, Sevda Nəsrullayeva 1943-cü ildə Bakı şəhərində anadan olub. O, Azərbaycan Dövlət Tibb İnstitutunu bitirib. Daha sonra Azərbaycan Həkimləri Təkmilləşdirmə İnstitutunun Terapiya kafedrasında klinik ordinator, aspirant və assistent kimi çalışıb. 1977-ci ildən Elmi-Tədqiqat Tibbi Bərpa İnstitutunda böyük elmi işçi, Funksional diaqnostika şöbəsinin müdiri, institutun direktoru vəzifələrində çalışıb. 1994-cü ildən institut direktorunun elmi işlər üzrə müavini kimi fəaliyyət göstərib.
Həkim ilk dəfə olaraq şəkərli diabet xəstəliyinin müxtəlif fəsadlarının müalicəsində Azərbaycanın təbii amillərinin (Naftalan nefti, müalicəvi palçıq və mineral sular) tətbiq edilməsini elmi cəhətdən əsaslandırıb və yeni fizioterapevtik üsullarını işləyib hazırlayıb.
Alim 100-dən artıq elmi işin və 5 ixtiranın müəllifidir.
Sevda Nəsrullayevanın fəaliyyəti dövlətimiz tərəfindən də yüksək qiymətləndirilib. O, "Əməkdar həkim" fəxri adına və "Tərəqqi" medalına layiq görülüb.
Həkim Azərbaycanda fizioterapiya, kurortologiya və təbii sərvətlərin öyrənilməsi istiqamətində böyük işlər görüb. ETTBİ-da gənc elmi işçilərin yetişməsində onun müstəsna rolu var.
Sevda Nəsrullayeva institutda çalışdığı illər ərzində kollektivin böyük hörmətini qazanıb.