Azərbaycan Tibb Universitetinin (ATU) Tədris Terapevtik Klinikasının müalicə işləri üzrə direktor müavini Fəridə Hacıyeva, klinikanın həkimləri və rezidentlərinin iştirakı ilə “Ağciyər arteriyasının tromboemboliyası" mövzusunda seminar keçirilib.

Tədbirdə çıxış edən rezident Nərgiz Səttarova xəstəlik, onun diaqnostikası və müalicəsi haqqında ətraflı məlumat verib.

Bildirib ki, aşağı ətrafların dərin venaların trombozu və onunla əlaqədar baş verən ağciyər arteriyasının tromboemboliyası müxtəlif profilli stasionarlarda ölümün ən çox rast gəlinən səbəblərindəndir.

Onun sözlərinə görə, patoloji anatomik təşrihlər zamanı ölüm səbəbləri arasında ağciyər arteriyasının tromboemboliyası 2-15% hallarda qeydə alınır. Xəstələrin 70%-dən çoxunda ağciyər arteriyasının tromboemboliyası diaqnozu ölümdən sonra qoyulur.

Həkim dərin venaların trombozunun (DVT) ən təhlükəli ağırlaşmasının ağciyər arteriyasının tromboemboliyası olduğunu da diqqətə çatdırıb.

Seminarda klinikaya müraciət edən və müalicə alan 61 yaşlı qadın xəstənin analizlərinin nəticələri, onların təhlili və müalicəsi haqqında ətraflı məlumat verildi.

Sonda N.Səttarova tərəfindən iştirakçıların sualları cavablandırılıb, mövzu ətrafında geniş müzakirələr aparılıb.