Aztibb.az xəbər verir ki, tanınmış həkim-pediatr Aytən İsmayılzadə uşaqlarda dişlərin müalicəsi üçün tətbiq edilən sedasiya üsulunun mənfi cəhətlərindən bəhs edib. "Sedasiya sadəcə uşağı yatızdırmaq deyil", - deyən həkim əlavə edib ki, bu, həm də narkotik analgetik dərmanla bu dünya ilə beyinin əlaqəsini kəsməkdir. Dərman bədəndən çıxmayınca, çağırsan da, nə etsən də uşaq ayılmaz.

 

İstifadə olunan maddələr beyinin koqnitiv funksiyalarına təsir edir. Yaddaş, qavrama, analiz - sintez qabiliyyəti, nitq və s. Xüsusən 4 yaşa kimi sedasiya olmaz. Yalnız çox vacib əməliyyata görə sedasiya, narkoz istifadə edilməlidir: 

 

"Mən bir həkim kimi sedasiyanı nə pasiyentlərimə, nə valideyn kimi öz uşaqlarıma məsləhət görürəm. Əgər hansısa uşaq həkimi yaxın buraxmır və dişlərində dərin karies varsa, bunun da yolunu tapmaq lazımdır. Ya dişləri əvvəlcədən qorumaq lazımdır, ya da iynənin yerini də keyidib müdaxilə etmək olar. Çürük dişlər infeksiya mənbəyidir, amma bunu 2 saat sedasiya ilə müqayisə etsək, infeksiya daha "yaxşıdır".

 

"Övladlarınızı qoruyun. Onları kiminsə qazanc mənbəyinə qurban verməyin", - deyə A.İsmayılzadə valideynlərə çağırış edib.