Bir yaşı tamam olmayan körpələrin yaxınları tərəfindən atılıb-tutulması təhlükəlidir.
Aztibb.az xəbər verir ki, bunu Səhiyyə Nazirliyinin mütəxəssis-eksperti, pediatr Erkin Rəhimov nazirliyin rəsmi instaqram səhifəsindəki canlı yayım zamanı deyib.
“Körpələrin başı ani hərəkətlərə tab gətirmir və bu kimi hallarda beyin silkələnməsi ola bilər. Eyni zamanda körpəni atıb-tutan şəxsin ani fikir yayınması da ağır fəsadlarla nəticələnə bilər. Odur ki, körpəni atıb-tutmaq oyun kimi görünsə də təhlükəlidir.
Uşaqların ayaqlarının əyriliyinə görə edilən masajın həmin problemin həllinə faydası yoxdur. Bu kimi masajlardan nəticə alınması fərdi xarakter daşıyır. Lakin elmi təbabətdə masajın müsbət təsiri deyə bir anlayış yoxdur. Ayaq əyriliyi ilə bağlı mütləq şəkildə ortopedə müraciət edilməli, lazım gələrsə müalicə təyin olunmalıdır. Bəzi hallarda isə körpədə müşahidə olunan əyrilik öz-özünə düzələ bilər”.