Prenatal skrininq körpə hələ ana bətnində olarkən müxtəlif xromosom anomaliyalarının mövcud olma riskini müəyyən edən laborator testlər toplusudur. Bu testlər arasında ən təhlükəsiz və maliyyə cəhətdən sərfəli olanı “Hamiləliyin birinci və ikinci trimestrində aparılan skrininq testləri”dir. Bu zaman ana qanındakı biokimyəvi markerlər və dölün USM göstəriciləri xüsusi bir proqrama daxil edilərək döldə bəzi xromosom anomaliyaları riski yoxlanılır. Bu zaman əsas məqamlardan biri isə ana qanındakı bioloji markerlərin MOM (Multiple Of Median) dəyərlərinin düzgün olmasıdır. Çünki nəticələr bu dəyərə əsasən qiymətləndirilir.

 

Aztibb.az  Referans Medical Group-a istinadla xəbər verir ki, MOM dəyəri hər bir populyasiya üçün individual xarakter daşıyır və hamiləlik həftəsinə görə dəyişir. Döldə anomaliyarın çıxma riski isə məhz sözü gedən MOM dəyərlərinin hamiləlik həftəsinə görə nə dərəcədə yüksək və ya aşağı olmasından asılıdır.

 

Qeyd edildiyi kimi, MOM dəyəri hər bir populyasiya üçün individual olduğu üçün skrininq testlərinin ölkə xaricinə göndrilməsi və ya pasiyentlərin ölkə xaricində test verməsi yanlış pozitiv və neqativ nəticələrin olmasına səbəb olur. Bu isə pasiyentlər arasında gərəksiz ajeataja və daha mürəkkəb testlərdən keçməsinə, bəzən isə abortların aparılmasına səbəb olur.