Ofis həyatı özü ilə kürək, boyun və bel ağrılarını da gətirir.

Aztibb.az xəbər verir ki, həkim osteopat Pərvin Əkbərov "ofis ağrıları" deyə biləcəyimiz ağrılardan 5 sadə vərdişlə qurtulmaq mümkün olduğunu deyib.

1. Erqonomi – Öncə oturduğumuz kreslomuzu belimiz dəstəkləyəcək şəkildə erqonomik kreslo modeli ilə dəyişdirməliyik. Hazırda ayaq üstə işləmək üçün uyğun hündürlüyü tənzimləyən masalar da mövcuddur. Düzdür, çətindir amma imkan daxilində gündə 1-2 saat ayaqüstə çalışmağınız daha yaxşı olardı. Erqonomi üçün əsas məqamlardan biri də kompüter monitorunun göz bərabərində olmasına önəm verməkdir.

2. Hərəkət – Hərəkətsiz həyat onurğanın düşmənidir. 40 dəqiqədən bir 2-3 dəqiqə işinizə ara verib, dolaşmanız həm onurğanız, həm də gözünüz üçün faydalıdır. Evə dönərkən 1 dayanacaq öncə düşüb evə qədər yürüyərək getməyinizi vərdiş halına gətirməyə çalışmalısınız.

3. İdman - Bel və boyun əzələlərinizi gündə 10 dəqiqəlik evdə idman hərəkətləri etmək yeterli olacaqdır. Səhifəmizdə bu növ idman videolarına baxmağınızı tövsiyə edirik.

4. Susuzluq- Onurğamızda fəqərələr arası disklərinizin əsas hissəsi sudan təşkil olunmuşdur. Gündə ən azı 2 litr su içmək gündəlik su təlabatınızı qarşılayacaqdır.

5. Stres - Stresdən uzaq olmağa çalışmalısınız. Stresimiz artdığında əzələlərimiz gərilərək onurğamızı daha çox yükləmiş olur.