70 yaşlı qadın qanazlığı şikayətləri ilə rayonlardan birində həkimə müraciət edib. Qarın boşluğunun USM və KT müayinəsində qaraciyərin qapısında, qalxan çəmbər bağırsaqda təqribən 9-10 sm ölçüdə törəmə və yanaşı olaraq öd kisəsində çoxsaylı 2,5 sm ölçüsündə daşlar aşkar olunub. Xəstə Akademik M.A.Topçubaşov adına Elmi Cərrahiyyə Mərkəzində uğurla əməliyyat edilib. 

 

Aztibb.az xəbər verir ki, bu barədə Mərkəzin Qaraciyər, ödkisəsi və mədəaltı vəzi xəstəliklərinin cərrahlığı şöbəsinin baş elmi işçisi, tibb elmləri doktoru, professor Zərraf Şirinov “Facebok” sosial şəbəkəsində məlumat paylaşıb:

 

"Bir faktı qeyd edim ki, yoğun bağırsağın sağ yarısının törəmələri, bir qayda olaraq, anemiya ilə müşaiyət olunur. Xəstəyə Elmi Cərrahiyyə Mərkəzində kolonoskopiya olunub, qalxan çəmbər bağırsağın törəməsi bağırsağı tam abturasiya edilib. Biopsiya götürülüb, -atipiya təsdiq olunub".

 

Zərraf Şirinov bildirib ki, qanköçürməklə müvafiq əməliyyatönü hazırlıqdan sonra pasiyentə açıq üsulla orta kəsiklə müştərək əməliyyat: xolesistektomiya və sağ tərəfli yoğun bağırsağın törəmə ilə, böyük piyliklə və ətraf limfa sistemi ilə birlikdə xaric edilməsi əməliyyatı icra olunub.

 

Onun sözlərinə görə, hazırda xəstə aktivdir, qida qəbulu və fizioloji aktlar normaldır. Məmnun halda evə getməyə hazırlaşır.