Xətai Tibb Mərkəzinin həkim-terapevti Araz Ağayev Vətən müharibəsinin ilk günündən, sentyabrın 27-dən ehtiyatda olan tibb xidməti baş leytenantı kimi cəbhəyə yollanıb. Oktyabrın 10-dan Murov, Suqovuşan, Talış və Ağdərə istiqamətlərindən döyüşlərə qatılıb.
Araz Ağayev həm döyüşçü, həm də həkim kimi döyüşlərdə iştirak edib. Döyüşüb, yaralanan çiyindaşlarına isə ilk tibbi yardım göstərib.
O, müharibədən sonra Prezident İlham Əliyevin əmri ilə “Hərbi xidmətlərə görə” medalı ilə təltif olunub.
Araz həkim 1980-ci ildə anadan olub. Azərbaycan Tibb Universitetinin Müalicə-profilaktika fakültəsini bitirib. Ali təhsilini başa vurduqdan sonra bir çox müalicə müəssisələrində həkim kimi çalışıb. Hazırda Xətai Tibb Mərkəzində xəstəliklərlə mübarizədə fəal “döyüşçüdür”.
