Ciddi daralmış (>50%) və tam tıxanmış (100%) damarlar mütləq açılmalıdır.
Aztibb.az-ın xəbərinə görə, ürək-damar cərrahiyyə uzmanı Cabir Gülmalıyev bu barədə məlumat verərək bildirib ki, ürəyin tac damarlarından birində daralma və tıxanma olarsa, bu ölüm daxil olmaqla ciddi nəticələrə səbəb ola bilər. Daralma vaxtında aradan götürülməzsə, infarktla nəticələnir.
Həkimin sözlərinə görə, damar tıxanmalarının ilk simptomu döş sümüyünün arxasında yaranan ağrıdır. Əgər aktiv hərəkət zamanı təngnəfəslik və ağrı olursa, artıq ürək damar tıxanmasından şübhələnmək olar. Xəstəlik bəzən simptomsuz inkişaf edir. Heç bir şikayəti olmayan insanlarda yalnız müayinə zamanı damar tıxanıqlığı olduğu aşkar olunur:
"Siqaret, içki, stress, hərəkətsizlik, artıq çəki, yağlı qidalanma, şəkər xəstəliyi və s. səbəblər damarları zamanla tıxayır.
Dəqiq diaqnoz üçün koronar anqioqrafiya əsasdır. Angioqrafiyada aşkarlanmış daralmaların yerinə və ciddiliyinə görə dərman müalicəsi, invaziv üsullarla (stent) damar açılması və ya cərrahi əməliyyat tövsiyə olunur".