Sumqayıt Tibb Mərkəzinin (STM) direktoru Səkinə Sadıxovanın rəhbərliyi ilə tabeli tibb müəssisələrinin rəhbərlərinin və inzibati heyətin iştirakı ilə iclas keçirilib.
Şəhid ailələri və qazilər, onlarla görülən işlərə həsr olunan iclasda STM-in direktoru Səkinə Sadıxova çıxış edərək bildirib ki, ölkə Prezidenti, Ali Baş Komandan İlham Əliyevin rəhbərliyi ilə 44 günlük Vətən müharibəsində qəhrəman ordumuzun rəşadəti ilə şəhidlərimizin canı-qanı bahasına Ermənistanın 30 il ərzində işğalı altında olan torpaqlarımız azad edilərək tarixi qələbəyə imza atıldı.
Qeyd edib ki, bu gün qəhrəmanlarımızın ailə üzvləri Prezident İlham Əliyev, Birinci vitse-prezident Mehriban xanım Əliyeva tərəfindən daim diqqət mərkəzində saxlanılır.
Vurğulanıb ki, Sumqayıt Tibb Mərkəzi və tabeçiliyində olan müəssisələr tərəfindən şəhid ailələri və qazilərin müayinə, müalicələrinin təşkili, onlara sağlamlaşdırıcı tədbirlərin göstərilməsi istiqamətində zəruri addımlar atılır.
Sumqayıt Tibb Mərkəzinin direktoru S.Sadıxova gələcəkdə bu istiqamətdə görüləcək işlərlə bağlı Ailə Sağlamlıq Mərkəzlərinin baş həkimlərinə, tibb müəssisələrinin əməkdaşlarına, qazilərlə iş üzrə koordinasiya bölümünə müvafiq tapşırıqlar verib.
Bundan əlavə, hər bir baş həkimə şəhid ailələrinə və qazilərə göstərdiyi xidmətlə bağlı hər ay hesabatların verilməsi, Həmkarlar İttifaqı Şurasına isə şəhid ailələrinə və qazilərə ediləcək yardımlarla bağlı daha diqqətli və məsuliyyətli yanaşmaq tapşırılıb.
Tibb Mərkəzinin direktor müavinləri Təranə Rəcəbli və İlkin Namazov şəhid ailələrini və qaziləri ziyarət etmək, problemləri ilə daha yaxından tanış olub, tədbirlər görülməsi ilə bağlı çıxış ediblər.
