Azərbaycanda böyrək və qaraciyər köçürülməsi sahəsində ən böyük poblem mütəxəssis çatışmazlığı və donor tapılması ilə bağlıdır.
Bunu Milli Məclisin Səhiyyə komitəsinin sədri, akademik Əhliman Əmiraslanov deyib.
O qeyd edib ki, TƏBİB və Səhiyyə Nazirliyinin tabeliyində olan xəstəxanalarda ehtiyacı olan xəstələrə bu kimi əməliyyatların icrası üçün çox da böyük imkanlar yoxdur:
“Dediyim kimi ən böyük məsələ xəstəxanalarda orqan köçürülməsi ilə bağlı şəraitin yaradılması və kadr potensialı, ən önəmlisi isə donor tapıllmasıdır. Çünki bu gün böyrək və qaraciyər köçürülməsi üçün ancaq qohum donorlardan istifadə olunur”.
Komitə sədri hesab edir ki, ölkədə dializlərin sayı azalmalı və böyrək köçürülməsi üçün əməliyyatların sayı artmalıdır:
“Ölkədə böyrək və qaraciyər köçürməsi ilə bağlı statistika bir çox ölkələrdən geridir. Heç Avropa ölkələri ilə müqayisə aparmağa dəyməz. Düzdür 20 il əvvəlki illərləə müqayisədə irəliləyiş var lakin bu kimi əməliyyatları aparan klinikaların önündə nəinki yüzlərlə, hətta minlərlə xəstə insan növbəsi var. Bu kimi əməliyyatları aparan yeni mərkəzlərin yaranmasına ehtiyac var. TƏBİB, Səhiyyə Nazirliyi və İTSDA bu sahə ilə bağlı müzakirə keçirməli və məsələnin həlli istiqamətində addımlar atmalıdır”.